Një studim i ri ka treguar se nëse qëndroni për më shumë se 6 orë ulur në ditë, rrezikoheni nga vdekja e hershme. Studiuesit në Universitetin Simon Fraser në Kanada, zbuluan se njerëzit që kalojnë pjesë të konsiderueshme të ditës ulur kanë më shumë gjasa të vuajnë nga sëmundje kardiovaskulare.
Studiuesit thonë se sasia e kohës që njerëzit kalojnë ulur është rritur vitet e fundit, kryesisht për shkak të disponueshmërisë në rritje të teknologjisë si kompjuterët dhe telefonat inteligjentë. Stili i jetesës sedentare lidhet me shumë çështje shëndetësore, përfshirë obezitetin dhe diabetin.
Studiuesit, të cilët publikuan gjetjet e tyre në “JAMA Cardiology”, mblodhën të dhëna nga 105,000 njerëz në 21 vende, mesatarisht për 11 vjet. Të dhënat u mblodhën mbi sasinë mesatare të kohës që një person kalon ulur çdo ditë, qoftë për shkak të punës apo zgjedhjeve të tjera të stilit të jetesës.
Ata krahasuan normat e vdekshmërisë nga të gjitha shkaqet dhe sëmundjet e zemrës bazuar në kohën e qëndrimit ulur në ditë, me ato që kalonin më pak se katër orë në ditë ulur. Studiuesit zbuluan se ata që shpenzojnë rreth 4-6 orë në ditë ulur kanë më pak gjasa për të zhvilluar sëmundje të zemrës.
Megjithatë, njerëzit që kalojnë më shumë se kaq kohë duke qëndruar ulur çdo ditë mund të përballen me probleme. Në vendet e zhvilluara, dikush që rri ulur për 6-8 orë në ditë ka një rrezik më të shtuar të vdekshmërisë, raporton Daily Mail.
“Një çështje e rëndësishme për shëndetin publik është lidhja e kohës së qëndrimit ulur dhe aktivitetit fizik. Kjo sugjeron që vetëm reduktimi i kohës së qëndrimit ulur nuk ka gjasa të arrijë përfitime optimale shëndetësore pa rritur aktivitetin fizik,”, thonë studiuesit.
“Gjetjet tona ofrojnë mbështetje për udhëzimet aktuale që inkurajojnë “uluni më pak dhe lëvizni më shumë” për një shëndet më të mirë.“, thanë studiuesit.
